مدادي
مدادي ضيم
سال دموع
عل الورقة
وحرفي ليتيم
مكبوب من دواية gلبي
حسها مامسموع
خانوها شلا صباع
لله يادوك
مال وجهكم مشروك
مايتغسل
ف طريقنا تزرعو ف الشوك
جدر فيكم الغدر وحتل
تgطعو ف حبالنا تgطاع
هاد حقي
لي خديتو جروح
بان مسقي
نبت ف الروح
لعار عليكم
خلوه ليا بوح
باش هاد لgلييب يوساع
راني عييت ندادي
ونجمع ف مدادي
لي عل الورقة ساح
لgيت عودي فرادي
سرجو تلاح
مابان حقو وسط شياع
وما انت
لي جيتي تشفى ف كلام سيادي
هاكا قلم
ناس لملاح
سيلو دم
سيلو جراح
زرعو حدج تم
ينوض تفاح
ونزيدك عود خماسي
ب لكدم
باقي مساراح
خطاويه محسوبة ب لgامة ودراع
يلا غروك جروحي
هاكا هاااااا حر جوفي
يلا تشفيتي ف بوحي
هاكا هاااا كيات روحي
غير كون انت مول لمليح لي باع
يلا غرتك هادالعتبة
ودخلتي ل هاد الرحبة
غير تكاد ف الركبة
وزيين لكتبة
يلا فتي هاد لعgبة
نقرقب عليك سوارت الرباح
ونزيدك خابية مداد
غطس فيها جتا لgاع
Comentarios
Publicar un comentario