الباهيلي
وصية لشيخ القبيلة
خوفي عليك آشيخ القبيله
شتت الري والشوار
حللتي الخليله
تفتي ريها على ولدات الدوار
حلمة عريانة
تطلي النفس العليلة
تلاط بالعكر ( ك g )
زينها يعدم الفتيلة
ماتخلي رماد
باش تكحل الهبيلة
المهاوشة على البلاد ...
خوفي عليك آشيخ القبيله
من نهار العجاج
توكح البيار
العطش يموت ع للميها
يوقف موري المزاج
وافي عبار
ومابقات تفيدك حيلة
خوفي عليك
يجعر الجوع
يسيب اللسان
ناصل الطوع
يسوس الخملة القديمة
تسوط الحملة
موتو حياة
يطيح المرفوع
المشرع للشر طرقان
ومابقات دوزك مريرة
خوفي عليك ينفجر السكات
ومن ضبر الصبر
يقريك سلكات
وشمتيها قطران
أيام السيبة
ملي كنت تقول كذبااات
وتبات ف حجر البنات
سكرااان
تصفي سمياااات
ريحها تتشهاه السفينة
خوفي عليك أشيخ القبيلة
تحرام فيك الشوفة
الريوس اللي حزتيها
تحازك لجيهة
تقرا فيك حسيفة
تتمنى دودك يشفق عليك
يزرب على ذاتك العليلة...
خوفي عليك
الزريعة البرانية
سوست ف البلاد
الفلاح فلح
عيا مايقاد
وطلعت الغلة حرامية
ف كف القرض
متيريس يتزاد
حاسب حتى الوركة البوحاطية ..
خوفي عليك
خلي للما مين يدوز
شحال من راعي
ف غابتو غابت عليه العصا
وشحااال من طاغي
من البيار اللي تردم
طالب شربة
خوفي عليك أشيخ القبيلة
تبقى سيرتك
ف عين الموتى
دمعة ثقيلة
خوفي عليك آشيخ القبيلة
تقطع كااااع البحور
البر يحدك
تكبر حتى تعيا
شبر يقدك ....
......
سنة 2016
Comentarios
Publicar un comentario