زجلِيّة نثْرِيّة بعنوان
" لعْقَلْ خَاصّو تخْمِيلَة "
...
جِيتْ نْخَمّلْ عَقْلِي
لْقِيتْ لْبِيبَانْ رِيحْ
مَرّة تجْرِي
مَرّة اطّيحْ
لْقِيتْ سَقْفْها عَالِي
...
لْقِيتْ لعْمَدْ جِيرانْ
مْسَنْدَة غِيرَانْ
لحْيُوطْ ، وسْواسْ
سْطُورْهَا نَاسْ
ؤُ نَاسْهَا : تْرابْ بَالِي
...
لْقِيتْ رْسُومْ منْحُوتَة
هَادَا تَارِيخْ
ؤُ هَادَا مَرّيخْ
الرّاسْ نَاسُوتْ
ؤُ لْكَسْدَة : عَوْدْ خَالِي
...
جِيتْ نْخَمّلْ ، رَمّمْتْ
التّرْمِيمْ بَاغِي ترْقَاعْ
شْكونْ فِيّا بَاعْ
لَبْرَا دَمْ
ؤُ لْخَيْطْ : مجْروحْ بْحَالِي
...
لْقِيتْ السْوارَتْ
تَابْعَة امْحَارثْ
الزّونْ واكَلْ غَلّة
و لْغَلّة تْنَافقْ
كْروشْ السْلَالِي
...
لْقِيتْ النْهَارْ شَرْعَة
واللّيلْ تَرْعَة
هَادَا يكتَبْ فْ اللّوحْ
ؤُ هَادَا يْلُوحْ
الرّوحْ بِينهُمْ : تْشَالِي
...
جِيتْ نْخَمّلْ عَقْلِي
لْقِيتْ عَقْلِي دْرُوجْ
لْخَطْوَاتْ حْجَرْ
و الشّوفَة عْرُوجْ
و لْحلْمَة يَا لْحلْمَة
إِيمْتَا تْولِّي كلْمَة
إيمْتَا تْسَالِي
...
نون حاء
Comentarios
Publicar un comentario